名古屋風鰻魚飯 ﹣ 備長ひつまぶし

http://r.gnavi.co.jp/p365311/

ひつまぶし (Hitsumabushi) 係名古屋風鰻魚飯，有別於之前提過既關東關西風，但比較接近關西風味，亦係我鍾意既風味。

基本食法係分四碗食（當然可以唔跟，自己有自己食法）：

1．就咁食

2．加藥味（紫菜，蔥，wasabi，etc.）食

3．加湯食

4．Encore 最鍾意既食法

備長既鰻魚做得香脆，有啲似香港人做既燒白鱔。

喺備長我最鍾意 2 。

備長總店喺名古屋，係名店。

東京分店喺銀座 Tokyu Hands 樓上，位置便利，啱哂行完 Tokyu Hands 去食飯。

鰻魚飯要2,980円，有 Hands Card 有 95折，都唔平，但我覺得值得一試。

起碼一定好過所謂(前)米芝蓮既竹葉亭。

東京站超人氣拉麵 - 六厘舍

http://www.tokyoeki-1bangai.co.jp/ramenstreet/

又一間排到痴左線既拉麵店，
位於東京站既地下拉麵街。
八間麵店開埋一齊，唯獨呢間最長龍。
趁星期六得閒，緊係去試下啦。

十點幾，落住微雨，好彩由屋企去東京站全程唔駛揼雨。
十一點開門，我十一點去到，已經排到去「一小時等候區」！

期待期待再期待，十二點，終於有得坐。本來係滿心歡喜，點知...

隔離個男人早我三十秒坐低，碗麺食完，我嗰碗都仲未黎！喺等待到火黎既十分鐘，我細心望班店員做野，我就知呢間野 - 唔掂！

六條友（連廚師），serve 26個客，手忙腳亂，冇黎笑容。煮碗麵要十分鐘，唔怪得要排成粒鐘啦！同風雲兒四個人 serve 15個客，悠然自得，談笑用兵，喺你未坐低已經開始煮，冇得比呀。咁既服務，碗麵幾好食都冇用。

講返碗麵，¥850，其實係好食，甚至可能好食過香港所謂第一既豚王，但就係同豚王一樣 - 唔值得排呀！

佢個麵夠粗夠彈，同風雲兒有得揮。湯都夠濃，魚味好香。但作為沾麵（つけ麺），佢最大問題係湯唔夠厚。湯唔夠厚，就沾唔起，而且凍得快，口感差好遠。叉燒肥痩適又夠稔係幾好，但係得小貓兩三塊。最後，我碗湯冇飲哂，因為已經凍冰冰。

十二點半，離開，應該唔會再黎。

風雲兒，依然是皇者。

綠茶甜品 ＠ 中村藤吉 宇治 本店

http://www.tokichi.jp/

綠茶，最出名緊係宇治（京都付近）啦。
而宇治，最出名既綠茶甜品店就係中村藤吉。

平等院係宇治最出名既景點，庭園建築都好靚，一萬円紙幣上隻鳳凰就係喺平等院個屋頂。
由宇治車站行去平等院，一定會經過商店街，而經過商店街，就一定會經過中村藤吉。

中村藤吉本店係文化遺產，樓底高，好有懷舊風味。
上面第一幅圖片只供參考，因為實際個份量好大！
下層仲有一球雪糕，好多好多白玉，好多好多啫喱，
雖然好好食，都食唔哂！

去京都，如果有時間，推薦你去一去宇治，唔錯架 ^_^

關西風 Sukiyaki - 京都三嶋亭

http://www.mishima-tei.co.jp/

牛有好多唔同食法：
煎，串燒，日燒，韓燒，鐵板燒，打邊爐，刺身......
你最鍾意點食？

人大左，食野多左，口味都會變。
以前鍾意食鐵板燒，印象中食過最好既係神戶牛。
而家，最鍾意既係 Sukiyaki。

Sukiyaki 都有分關東關西風。
東京食到既多數係關東風，例如好出名既今半啦。
今次食既係關西風名店 ﹣ 京都三嶋亭。

晚飯要二萬円以上，我梗係唔捨得食啦（其實食過神戶米澤山形飛驒等等等等，就會覺得牛都有 decreasing marginal return。一萬円以上既牛，其實都唔係好分得到...）
今次食既係特價午餐，都要四千幾円。

關東關西分別在於關東風係先落汁，後落肉，有啲似香港打邊爐，不過汁係薄薄一層，唔會好似香港成煲湯咁。
至於關西風，係先落糖，乾煎牛肉，再加醬汁，汁既用量比關東風少。
我就鍾意食關西風多啲。

食完三嶋亭，真係念念不忘...
唔知東京邊度有關西風 Sukiyaki 食呢...

東京蠔吧 ﹣ Jackpot 汐溜

http://r.gnavi.co.jp/g203620/

Jackpot 喺東京有好多分店，今次食間近屋企既。

佢款式都算多，日本既都差唔多十款，不過外國既就得美國澳洲愛爾蘭。

熟食生食都幾好，最好食（竟然）係個意粉。

不過就偏貴啦，唔係咁值，不過要喺東京食蠔又真係冇乜選擇。

好懷念香港既 Casa Fina, 即叫即開即食既 Citysuper。

好懷念札幌既「開」。

奈良美食 5 ﹣ 最終章：超正 Soba!!!

よしむら (Yoshimura)，喺藥師寺同唐招提寺中間。

如果你打算去西京，建議你先行藥師寺，南門入，北門出，順路去唐三藏寺。

再順路北上食埋Yoshimura， 睇埋唐招提寺，唔駛走回頭路。

Soba 煙靭，香滑，自己喺屋企絕對煮唔到，加上溫度，醬汁味道都好配合，係山形以外我食過最好既 soba!

有得自己磨 wasabi，好玩！

汁煮鯛魚只係 500 yen，而且係超好食！

係奈良之旅最好味既一餐！

奈良美食 4 ﹣ 釜飯

志津香 ﹣ 喺奈良公園附近，都幾出名既釜飯店。
大部份都係遊客（包括日本人），玩完鹿就走黎晚飯。

我地醒目六點前就黎，緊緊唔駁排隊。
食完大約七點，嘩，排到返東京。

招牌菜係「七餸釜飯」，佢又話係奈良傳統啦。
佢既賣點係即叫即煮，所以都等幾耐下。
其實同香港既煲仔飯差唔多，佢餐牌有教你食飯焦，仲有英文添。

我地叫左一個七餸，一個鰻魚。
七餸分別係：蝦，蟹，雞，鰻魚，菇，紅蘿蔔同青豆。
最後兩樣好似好昆水...

至於味道呢？
嗯... 實在食唔出「釜」既味道...
又唔係難食，不過冇乜特別囉。

我都係覺得香港煲仔飯好食D...