顯示包含「拉麵」標籤的文章。顯示所有文章
顯示包含「拉麵」標籤的文章。顯示所有文章

2012年5月19日星期六

2011年 Tabelog 東京拉麵 第二位 - 門前仲町こうかいぼう(Koukaibou)

こうかいぼう在 Tabelog 2011全年平均得分為 4.00/5,僅次於 4.07分的つけ麺 道 得第二位。至於我最喜愛的風雲兒(一年吃了10+次,平均每次排隊45分鐘),得3.80分排第十,所以真是口味各有喜好,分數只供參考。

十大之中,我還試過第六位 3.81 (有三家第六位)的吉左右。我自己最愛始終是風雲兒,但只限つけ麺(沾麪),因為它的湯真是無敵!題外話:好的つけ麺並不是純粹把拉麵的湯和麪分開,而湯是要更濃,才沾得起來。

こうかいぼう同吉左右無論格局口味都好近似,走「平均型」路線,湯麵叉燒都各自出色又不搶大家風頭,最特別是麪身是非常非常的滑,比風雲兒的更好,我很喜歡。可惜兩家都在門前仲町附近,遠離旅遊區(築地巿場再過三個站),旅客較難有機會品嘗。二擇其一的話我會選擇こうかいぼう,因為店主夫婦都好好笑容好好禮貌,不似得吉左右催你又不讓你玩電話,而且こうかいぼう一碗拉麵只是¥600,つけ麺¥700,比吉左右便宜¥300!

我自己評分:
風雲兒 A
こうかいぼう A-
吉左右 A-



以前常常覺得日本隨便找一家拉麵店都比香港好,這一年發現其實日本差的拉麵店還不少,當中有不少是﹥3.5分的一百大。相反,香港的拉麵店近年越開越多,雖有不少賣廣告賣到天花龍鳳自稱日本正宗(by the way,正宗是不代表好吃的),吃過(還要大排長龍)便覺不知所謂,但實在有一兩家是有實力的。例如:

豚王 B
一風堂 C+
達磨 D



2011年11月19日星期六

東京站超人氣拉麵 - 六厘舍





http://www.tokyoeki-1bangai.co.jp/ramenstreet/

又一間排到痴左線既拉麵店,
位於東京站既地下拉麵街。
八間麵店開埋一齊,唯獨呢間最長龍。
趁星期六得閒,緊係去試下啦。

十點幾,落住微雨,好彩由屋企去東京站全程唔駛揼雨。
十一點開門,我十一點去到,已經排到去「一小時等候區」!

期待期待再期待,十二點,終於有得坐。本來係滿心歡喜,點知...

隔離個男人早我三十秒坐低,碗麺食完,我嗰碗都仲未黎!喺等待到火黎既十分鐘,我細心望班店員做野,我就知呢間野 - 唔掂!

六條友(連廚師),serve 26個客,手忙腳亂,冇黎笑容。煮碗麵要十分鐘,唔怪得要排成粒鐘啦!同風雲兒四個人 serve 15個客,悠然自得,談笑用兵,喺你未坐低已經開始煮,冇得比呀。咁既服務,碗麵幾好食都冇用。

講返碗麵,¥850,其實係好食,甚至可能好食過香港所謂第一既豚王,但就係同豚王一樣 - 唔值得排呀!

佢個麵夠粗夠彈,同風雲兒有得揮。湯都夠濃,魚味好香。但作為沾麵(つけ麺),佢最大問題係湯唔夠厚。湯唔夠厚,就沾唔起,而且凍得快,口感差好遠。叉燒肥痩適又夠稔係幾好,但係得小貓兩三塊。最後,我碗湯冇飲哂,因為已經凍冰冰。

十二點半,離開,應該唔會再黎。

風雲兒,依然是皇者。

2011年9月16日星期五

札幌白樺山莊@台場

星期日,踩單車去台場。
無意中睇到個馬騮表演,跟住星期一就見到隻馬騮上smap!

晏晝喺對住彩虹橋既starbucks hea,
夜晚食「台場拉麵祭」。

比起札幌個拉麵共和國,呢度都幾hea。
裝修求其,好多簡體中文字,冷冷清清。

食白樺山莊,當然冇札幌咁好味啦,不過都唔錯,叫做過下癮啦。我鍾意佢個味噌湯底係北海道系,偏甜,唔似東京系咁偏辣。叉燒好淋,三塊疊埋都可以一夾就散,而且有我鍾意既「新鮮豬味」。麵係鬈粗麵,似即食麵,唔夠咬口,我比較鍾意幼直硬身麵。

最後食左個京都豆腐雪糕,好香好滑,同埋佢倒轉都唔跌架!






2011年8月5日星期五

香港已摺的康竜 @ 有楽町

http://ramen-kouryu.jp/

上回提到:究竟哪家食店是日本本店較國外分店好呢?

康竜是其中之一。

特色1:可以入銀仔加麵底。
特色2:可自選湯濃淡、麵粗硬、配菜。

¥1050的叉燒拉麵,沒有得選配菜,我選濃湯,超硬麵。

比香港的「學師版」好吃多了。最欣賞是豬骨湯和叉燒的濃郁「豬味」。很多人不喜歡這「豬味」,覺得臭,但我很喜歡。香港的雪藏貨是做不到的。

That's why,香港的康竜摺了。


2011年7月31日星期日

台北第一的拉麵 - 阪急花月嵐

http://www.kagetsu.co.jp/index.html

喺新宿食左碗失望既拉麵,令我今次想講一講台北。呢個第一唔係openice、 tabelog 或者 ipeen,係我話既。今年年頭喺台北工幹一個月,我食左七次阪急花月嵐!信我,如果你住香港又想食碗日本級數既拉麵,唔駛咁遠飛黎東京咁遠,甚至福岡都唔駛,近近地飛台北就得啦!

題外話:有冇人可以話我知香港新開的一風堂如何?

花月嵐來自日本,得過啲唔知咩拉麵獎,數年前傳入台北,有頗多分店。有朋友話食過其他分店麻麻地,証明同一集團不同分店都有高低之分,唔同麥記呀。我食嗰間喺巿政府站,阪急百貨B1,隔黎係鼎鼎大名無論日夜都長龍既台北第一炸豬扒杏子。信我,呢間無論湯、麵、肉、蛋都絕對係日本級數,係我喺日本以外食過最好既拉麵,甚至比日本一啲次一級拉麵店還要好,亦好過香港既豚王。我食左七次,日食過,夜食過,唔同味唔同配菜都食過,真係正。

可惜,我啱啱食左新宿既花月嵐 - 非•常•失•望!好難食。你知唔知,其實要喺日本搵間難食既拉麵都唔易架,我搵到!

2011年6月27日星期一

「全東京第一」既拉麵 - 麵屋吉左右

http://r.tabelog.com/tokyo/A1313/A131303/13021140/

如果你去東京tabelog, 咩條件都唔揀,只揀「ラーメン」(Ramen, 拉麵),你就會見到呢間「吉左右」以3.97分(5分滿分)位列榜首。全日本計,佢排第八。

3.97又代表乜呢?參考呢啲分數一定要明白背後運作先有意義。以tabelog黎講,佢用「味道」、「服務」、「環境氣氛」、「性價比」同埋「飲品」既平均分作為總分。你可能覺得「味道」最重要,咁可能有間味道5分其他2分既會比較適合你、而呢啲美食亦往往因為總分唔高而被忽略。反而有啲飲品5分既拉高左個總分,食物可能麻麻。再者,每個人心目中既4分5分意義都唔同,所以,呢啲分數只能作參考,不能盡信。然而,呢間「東京第一」既拉麵咁近我屋企,冇理由唔試下啫?

講左咁耐,咁究竟好唔好食?
好食,好好食。

拉麵係700 yen, つけ麺(Tsuke men, 即湯麵分開上,味較濃)800 yen。加叉燒300 yen。我食左叉燒つけ麺,老婆食左叉燒拉麵。

湯:鰹魚湯底,香濃,而且好滑好滑。
麵:粗韌適中,又係好滑。
叉燒:入口即溶!不過太薄,食得唔夠過癮。
蛋:冇叫。
環境:得十個counter位,尚算闊落,乾淨整潔,冷氣好勁。
排隊:佢開11:30,我地星期六12:00去到,12:35有得食。
服務:店員得兩公婆,但由於排隊時已經點餐,所以等一陣就有得食。食拉麵,仲要求咩服務?
飲品:未冰水囉。
位置:東京metro東西線木場站步行5分鐘,大約係成個東京既東南面,較近東京站,銀座嗰頭。如果由新宿出發,搭都營新宿線喺九段下轉東西線,約半小時。

總括黎講,佢既質素風格同「風雲児」(3.75分,詳見前文)非常接近,好難講邊度好啲。若要比較,「吉左右」貴少少,冇蛋(要加錢),叉燒冇咁好食,比較唔就腳;但湯夠滑冇咁鹹,麵亦較滑,坐得舒服啲,排隊亦短啲。從旅遊角度黎睇,我會推介「風雲児」,始終冇必要為左碗拉麵用咁多交通時間。但我好有機會再黎,因為我屋企跑黎都只係廿零分鐘,踩單車十分鐘就到啦 =D

2011年6月22日星期三

「日本Openrice」新宿區排第二既拉麵 ﹣ 風雲児 (Fuunji)

http://r.tabelog.com/tokyo/A1304/A130401/13044091/







一個落雨既星期六既下午兩點,慕名黎到新宿既名店,見到條龍得幾個人以為好快有得食啦,點知排左兩秒鐘之後後面有個人彈出黎指我地去後面,原來隔條馬路有條超長龍排緊!最後,排左成粒鐘先有得食...

咁值唔值得排先?
我覺得值。因為佢:
﹣星期日唔開,我要食就唯有星期六,而且我覺得夜晚會更加多人
﹣同一般我地常見既拉麵有啲唔同,佢個湯頭係鰹魚湯,唔係豬湯,非常濃郁有膠質,飲落有驚喜,直情「嘩」左出黎
﹣隻溫泉蛋超好食
﹣啲叉燒唔係好肥,但好淋好入味,而且切成粗長條狀,口感比一片片好
﹣總括黎講係東京食過最滿足既拉麵

當然我未必會再排一粒鐘食第二次,有時間我都試下第二間先啦。
但如果大家黎東京旅行,我覺得呢間都值得一試,一來喺新宿邊,尚算就腳,二來佢真係好食過好多其他旅行書既介紹(e.g. 毛迪加,壹難,壹瘋糖)囉。

佢夜晚仲有一款限賣20碗既拉麵,有興趣不妨4點鐘去排隊啦~
仲有仲有,呢度加大個麵底係唔駛錢架~

P.S. 新宿區排第一嗰間喺大久保,應該冇乜機會走去嗰頭...