和牛•紅酒•開瓶器

鹿兒島的和牛肩肉，每晚超市關門前都特價。

超市的紅酒選擇不多，這次是 Chateau Beaumont 2007, 丹寧柔順，微辛，果香，易入喉，不太甜，好舒服。

這篇的重點其實是開瓶器。
喜歡這種「淨旋轉型」，不需槓桿原理，又撬又拉。只需轉轉轉，瓶塞乖乖走出來，不需技術，三歲小孩都懂。更喜歡內置的「割紙器」，能簡單完美地割出瓶塞招紙，不像一般的開瓶刀又危險又𠝹得岩慚。這開瓶器真是好睇又好用 =)

築地non壽司神店 - 高はし(Takahashi)

築地除左壽司，其實仲有好多好野食。

今次試高はし - 俾好多台灣blog吹捧既神店，堪稱築地non壽司既冧巴溫。

星期六十二點幾，行過場內市場6號街，壽司大同大和例牌排長龍。行過兩條街去到8號街就係高はし啦。隔離兩間魚生飯好長龍，高はし等五分鐘就有得食。

成間鋪得十個吧檯位左右，雖然逼夾但好乾淨企理又有濕紙巾任攞。佢有刺身，煮魚，燒魚。我地叫左出名既海鰻飯（係anago, 唔係鰻魚 unagi)同刺身定食。

先上前菜，普普通通。不過聽聞熟客既前菜會好正。海鰻飯好得，夠香，夠淋，入味，飯汁比例適中，一啲骨都冇，爬爬爬好快就KO一碗。刺身得鮪，鰤同埋帆立貝，新鮮厚肉但份量少。最失敗係碗飯，係冇醋白飯，同刺身好唔夾，最後冇食哂。埋單¥2400，築地黎講係好平。

總結：普通好味，絕非神級（可能因為我唔係熟客又冇叫佢啲神作啦），算平。因為近屋企又唔駛久等，會再幫襯。如果係遊客就算罷啦，除非鍾意平民風味，否則唔駛特登黎築地食佢。

推薦：海鰻飯(あなご丼, anago don)

吉祥寺牛肉球 さとう (Satou)

http://www.shop-satou.com/shop01.html

日本三大牛（so call 啦）之松阪牛專門店。
閒閒地萬幾二萬yen落樓仲分分鐘食唔飽。
我緊係食唔起啦。

但係佢將啲牛頭牛尾牛碎剁埋造炸牛肉球擺喺街邊賣真係好正。雖然係頭頭尾尾，但話哂都係靚牛呀，咬落好juicy架。最重要係佢只賣¥180一個，買得多仲有折添，所以就成日排長龍啦。唔知幾時香港會抄呢？

雖然築地都有分店，但係係冇牛肉球賣架。

最強的芝士蛋糕 - 北海道小樽 leTAO

http://www.letao.jp/

最強的是double fromage，雙層芝士。
自從小樽一試，至今難忘。

這個是弟弟，雖不及大哥，但已十分高水準。
能夠在東京碰到，令人份外感動。

這實在是「日式蛋糕」的代表作。

三星期食左五次既晚餐

松屋蕃茄漢堡套餐。
¥580 有飯有餸有菜有湯又快又好味又飽肚。

15yen喺日本買到乜？

200g既芽菜，櫪木縣日光市產。
好味，食完冇肚痛。

從未見過日本有15yen買到既野！
歡迎挑機！

合味道杯飯

- 二百幾yen，同杯麵差唔多價錢
- 一定要用微波爐
- 食得多杯麵（其實我平均一季先食一次杯麵），轉下口味都唔錯
- 米係國產（日本產）米，口感好好
- 其實日本叮叮飯技術已經好成熟，今次只係加包味粉假蝦假肉俾你，咁就比叮叮白飯貴一百yen
- 相等於兩個飯團份量，都幾飽肚
- 要拆包包沖水再叮再焗再落調味油再撈，都幾煩
- 如果唔嫌凍食，真係食兩個飯團好過，仲新鮮仲健康
- 再唔係，落街食個牛丼都係加幾十yen啫，乾手淨腳
- 結論：幾好味，幾過癮，但冇意慾再買