第一次喺日本食法國餐 ﹣ Sky Restaurant @ 銀座

http://www.sky-ginza.com/

第一次喺日本食法國餐 - 第一次同老婆慶祝生日。雖然好貴，但無論食物、環境、服務都一流，物超所值。

餐廳位於銀座一間酒店既頂樓，唔係好高，唔算好靚既夜景，不過就好開揚同埋望到自己屋企。佢屬於黑掹掹嗰啲格局，裝修頗高級，枱與枱之間隔得幾開；我地坐窗口位，侍應英文流利又醒目，成餐飯食得好舒服。

我地叫左「廚師推介」餐，雖然貴，但我都推介。

頭盤係磨菇湯配烤磨菇，個湯濃到好似十斤菇煲埋一碗咁，嗰種新鮮既菇味真係香到樓下都聞到。

頭盤之後竟然黎左個「甜品拼盤」 - 梳扶里配macaron。我老婆食完話好好味，前者味道香濃質感幼滑，後者外脆內軟又唔甜，問我係咩黎，我話：「老婆，鵝肝黎架！」

食完頭盤先黎麵包。一款係洋蔥包一款唔記得左，我淨係記得個洋蔥包好香好鬆化，真係十個都食得落，但要留肚食主菜，唯有忍下口。

主菜1 係全晚焦點之一 - 龍蝦蟹肉魚子醬牛油果茄子。佢係一個長條形，好似蛋糕咁，我最欣賞係佢花心思去鋪排啲材料。最底一層係一半牛油果一半茄子，中間係三份一蟹肉加三份二龍蝦，龍蝦上面再鋪魚子醬。咁樣你垂直切就可以每啖都品嘗到唔同口感唔同味道既配搭。好新鮮，好有創意，好好味。

主菜2 係法國菜唔少得既鵝肝。呢件鵝肝係我食過之中烹調得最好，份量最大既一件。份量大，夠厚特別有口感。火候好，唔生唔老脆而唔噥。本身靚，食落陣陣甘香。汁校得好，去油膩再突出鵝肝香味。塾底既薯蓉吸哂鵝油，效果就如打完邊爐整個公仔麵，完美！

高潮過後，黎個雪芭清清口腔。

小休後再戰，係煎比目魚同埋牛柳。講真已經唔係好記得詳細情形（六星期前既事囉，所以上面所述既真係好好食，令我仲記得），只係記得好好食。

食到呢度，仲未完。侍應安排我地去「飯後區」繼續。飯後區係一個更黑既清淨既角落，有好似張床咁既梳化，有張茶几，几上有蠟燭，好不浪漫。我既甜品係朱古力拼盤，有幾款蛋糕幾款朱古力，而老婆因為生日有特製既士多啤梨拼盤。上甜品既同時，侍應捧出我預訂既花，幫我地影相仲即時print返俾我地添。唔駛食甜品，我老婆已經甜到漏啦 =D