東京站超人氣拉麵 - 六厘舍

http://www.tokyoeki-1bangai.co.jp/ramenstreet/

又一間排到痴左線既拉麵店，
位於東京站既地下拉麵街。
八間麵店開埋一齊，唯獨呢間最長龍。
趁星期六得閒，緊係去試下啦。

十點幾，落住微雨，好彩由屋企去東京站全程唔駛揼雨。
十一點開門，我十一點去到，已經排到去「一小時等候區」！

期待期待再期待，十二點，終於有得坐。本來係滿心歡喜，點知...

隔離個男人早我三十秒坐低，碗麺食完，我嗰碗都仲未黎！喺等待到火黎既十分鐘，我細心望班店員做野，我就知呢間野 - 唔掂！

六條友（連廚師），serve 26個客，手忙腳亂，冇黎笑容。煮碗麵要十分鐘，唔怪得要排成粒鐘啦！同風雲兒四個人 serve 15個客，悠然自得，談笑用兵，喺你未坐低已經開始煮，冇得比呀。咁既服務，碗麵幾好食都冇用。

講返碗麵，¥850，其實係好食，甚至可能好食過香港所謂第一既豚王，但就係同豚王一樣 - 唔值得排呀！

佢個麵夠粗夠彈，同風雲兒有得揮。湯都夠濃，魚味好香。但作為沾麵（つけ麺），佢最大問題係湯唔夠厚。湯唔夠厚，就沾唔起，而且凍得快，口感差好遠。叉燒肥痩適又夠稔係幾好，但係得小貓兩三塊。最後，我碗湯冇飲哂，因為已經凍冰冰。

十二點半，離開，應該唔會再黎。

風雲兒，依然是皇者。