築地食堂 @ 晚上的築地

以前聽人講，去築地唔好揀星期日或者平日午後，因為會「冇野食」。Well, 當然壽司大呀大和呀係冇得食啦，但係如果你要求唔係好高，場外市場依然有好多選擇。有一個星期日去到，間間長龍；上星期五晚去到，燈火通明。點會「冇野食」？

嗰晚，撞左入「築地食堂」。唔係壽司店，係平民魚料理店。我地叫左金目鯛煮定食同埋刺身定食，分別¥1000 同¥1500。

金目鯛，無論材料烹調都比我喺熱海食既差得多。但係一半價錢，想點？

刺身，唔錯，有五款，有拖羅，好新鮮。

好平既晚餐，質素普通既晚餐。

以前做遊客成日黎築地，但隨住匯率攀升，香港高級壽司店水準越黎越高，喺HKD500樓下一餐既range，我覺得築地既性價比已經落後於香港。而家住築地附近，反而會想食香港既今村、壽司廣、Nobu...

然而，HKD500樓上一餐既，我覺得日本仍然贏香港。但已經唔係講緊築地。