日式BBQ 自己郁手燒

http://r.tabelog.com/tokyo/A1308/A130801/13002752/

這餐是すみやき (Sumiyaki)，即炭燒。其實是港式BBQ和日式爐端燒合體。平時覺得串燒師傅燒雞翼時轉轉轉，灑灑鹽，好鬼有型好好玩，在這裏你可以過過癮扮大師。

小店在赤坂一大廈四樓，幾隱閉。內裏裝修非常懷舊，像「阿信的故事」，好有風味，好呃到遊客。

食物呢？材料應該是十分新鮮的，但奈何我們的「燒功」有限，弄得食物不是太生，就是太火農。不過，圍著炭爐跟朋友談天說地，也是樂事。

串燒不同燒肉，師傅功力非常關鍵。想玩，想飲下野，這裡不錯。想食靚串燒？下次再介紹。

東京的葡國風情

http://r.tabelog.com/tokyo/A1316/A131602/13035657/

星期六早上探訪朋友家，來到「白金高輪」這未聽過的地方。

很寧靜、很悠閒的住宅區。

午餐在朋友家附近的葡萄牙餐廳。很小，很街坊，很「澳門」。第一次在日本吃葡菜，感覺是比香港澳門的啱口味，有姿勢、有實際。

這裡午餐¥2000，有湯，包，前菜五款選兩款，主菜五款選一款，蛋糕和飲品。蛋糕可轉紅酒。

主菜推介「黑毛豚」。

這家店不是超級美味，但¥2000有這份量這質素這情調，是比麥記更超值的超值午餐。

我最喜愛的炸豬扒

http://www.fukunaga-tf.com/katsukura/

比較對手：
下列係我食過最好既同類炸豬扒，括號內係大約食過既次數。
香港 - 丼吉(4)、銀座梅林(4)
台北 - 杏子(1)、勝博殿(3)
曼谷 - 勝博殿(10)
東京 - 和幸(1)、さき(Saki)庭(1)、名代(4)

比較項目：
只比豬扒，唔計蝦、蠔、飯、菜...

排名：
我心目中大概分左四個level，1係最好食。
1 - 名代、さき庭
2 - 銀座梅林、杏子
3 - 勝博殿
4 - 丼吉、和幸

我最喜愛：
係名代既「桃園豚」。
唔好問點解，你去試下就知。
佢喺新宿高島屋14/F。
一份120g既桃園豚餐只係¥1980，晚餐一樣。
如此美味既豬扒，白飯椰菜又任裝，個湯都好好飲，環境舒適服務一流，絕對係血拼完補充體力既首選！不過建議你十一點前或兩點/九點後先去，以免排長龍。

如果要挑剔豬扒之外既，就係名代冇芝麻醬。

假日午餐 @汐溜 Conrad

http://www.conradtokyo.co.jp/kazahana/

這餐廳環境非常優美，樓底高，視野廣，遙望台場富士電視台。侍應都穿和服，服務就是日本頂級酒店的質素。食物都很別緻，看得出師傅一絲不笱。說說笑笑，整頓飯都十分enjoy。

從香港角度看，這餐是有點貴。
從日本角度看，這是值得。
無論如何，最重要係，呢餐有人請 =D

同時列入正版/庶民米芝蓮 - 竹葉亭（鰻魚飯）@銀座

http://www.unagi-chikuyoutei.co.jp/

竹葉亭係銀座區既鰻魚飯老店，江戶末期（約150年前）喺京橋附近（現在既新富町）開業，至今已經傳到第七代。東京米芝蓮同庶民米芝蓮先後喺2008年出版，而竹葉亭竟然能夠同時列入正版米芝蓮既一星同庶民既三星，實在非常特別。是否意味佢又平又好食？

今次食既係分店，位於銀座晴海通三越對面，一出地鐵就見。我同老婆由屋企踩單車，十分鐘就到。星期日中午，等位都只係約五分鐘。坐樓上tatami，係真係要跪嗰隻。環境係冇乜特別既日式裝修，不過聽講木挽町本店好靚。服務普通啦，喺日本，算唔上好。餐牌有中英文，遊客都唔怕。

鰻魚，係好講究既日式料理，講究情度不下於壽司。俗語話「串三年，剖八年，燒一生」，既係學串鰻魚要三年，學剖要八年，學燒要學一世。（題外話：亦有說「剖五年」，可能嗰個人勁啲啦。但好多台灣blog將「串」同「剖」掉轉我就唔認同，因為我覺得剖應該難過串。）

另外，關東關西都有唔同做法。關東風，又稱江戶風，鰻魚切頭切尾，從背部劏，先蒸（令魚皮變軟），後斬件用竹籤串燒，講究燒烤時既細心，肉質既嫩滑。關西風唔切頭尾，從魚肚劏，唔蒸，用鐵籤原條串燒，燒得比較豪邁，魚皮香脆，為求香脆燒焦都唔理。據聞關東風鰻魚唔劏肚係因為江戶時代武士忌諱「剖腹」，是真是假無從稽考。

又題外話：其實名古屋都有自己既風格，叫「ひつまぶし」(Hitsumabushi)，
當地人叫Hitsumamushi，Mamushi喺關西就係鰻魚咁解。佢既食法係將鰻魚飯分三份 - 第一份就咁食，第二份加葱加wasabi，第三份加茶或湯汁。有店甚至分四份，第四份你可以再歎你最喜歡嗰款。不過呢種「風格」好易抄，而家喺香港都見到。

咁，咩風最好食？因人而異，也因店而異啦。憑記憶感覺，我最喜歡喺京都食過既一次關西風。有機會大家一定要試下。但事實上而家就算喺關西都越黎越多關東風既鰻魚店，大家食之前要睇清楚呀。

講返竹葉庭。我地叫左¥1890既普通鰻魚飯A。嗯... 普通好味啦。佢既鰻魚係好嫩滑，比一般超市、餐廳既好食。但我嫌佢唔夠汁，可能佢唔想蓋過鰻魚本身既味道，但我唔太鍾意接近白飯既味道配鰻魚。其實佢冇乜唔妥，只係覺得「唔係掛，咁就係米芝蓮？」事實上好多人都話米芝蓮冇公信力。我希望可以親身去驗證多啲！

除左「風」，其實仲有兩點值得一提。
1. 即燒？竹葉庭上菜超快，我懷疑佢唔係。
2. 鰻魚係天然定養殖？絕大部份喺日本食到既都係養殖，包括竹葉庭。人人都話「野田岩」好食好多，而「野田岩」就係自稱用天然鰻。希望搵日去試下。

估唔到寫下寫下寫左咁長。有時食野研究下食物食店背後既歷史文化，的確好有趣 =D

日本的 Haagen-Dazs

非常喜歡日本的 Haagen-Dazs 差不多每兩星期都有新出品，為生活帶來一點驚喜。今次是我最喜愛的香蕉味！十個讚！

「全東京第一」既拉麵 - 麵屋吉左右

http://r.tabelog.com/tokyo/A1313/A131303/13021140/

如果你去東京tabelog, 咩條件都唔揀，只揀「ラーメン」（Ramen, 拉麵），你就會見到呢間「吉左右」以3.97分（5分滿分）位列榜首。全日本計，佢排第八。

3.97又代表乜呢？參考呢啲分數一定要明白背後運作先有意義。以tabelog黎講，佢用「味道」、「服務」、「環境氣氛」、「性價比」同埋「飲品」既平均分作為總分。你可能覺得「味道」最重要，咁可能有間味道5分其他2分既會比較適合你、而呢啲美食亦往往因為總分唔高而被忽略。反而有啲飲品5分既拉高左個總分，食物可能麻麻。再者，每個人心目中既4分5分意義都唔同，所以，呢啲分數只能作參考，不能盡信。然而，呢間「東京第一」既拉麵咁近我屋企，冇理由唔試下啫？

講左咁耐，咁究竟好唔好食？
好食，好好食。

拉麵係700 yen, つけ麺（Tsuke men, 即湯麵分開上，味較濃）800 yen。加叉燒300 yen。我食左叉燒つけ麺，老婆食左叉燒拉麵。

湯：鰹魚湯底，香濃，而且好滑好滑。
麵：粗韌適中，又係好滑。
叉燒：入口即溶！不過太薄，食得唔夠過癮。
蛋：冇叫。
環境：得十個counter位，尚算闊落，乾淨整潔，冷氣好勁。
排隊：佢開11：30，我地星期六12：00去到，12：35有得食。
服務：店員得兩公婆，但由於排隊時已經點餐，所以等一陣就有得食。食拉麵，仲要求咩服務？
飲品：未冰水囉。
位置：東京metro東西線木場站步行5分鐘，大約係成個東京既東南面，較近東京站，銀座嗰頭。如果由新宿出發，搭都營新宿線喺九段下轉東西線，約半小時。

總括黎講，佢既質素風格同「風雲児」（3.75分，詳見前文）非常接近，好難講邊度好啲。若要比較，「吉左右」貴少少，冇蛋（要加錢），叉燒冇咁好食，比較唔就腳；但湯夠滑冇咁鹹，麵亦較滑，坐得舒服啲，排隊亦短啲。從旅遊角度黎睇，我會推介「風雲児」，始終冇必要為左碗拉麵用咁多交通時間。但我好有機會再黎，因為我屋企跑黎都只係廿零分鐘，踩單車十分鐘就到啦 =D