築地兩大長龍之一 ﹣ 大和壽司

http://r.tabelog.com/tokyo/A1313/A131301/13002389/

好耐冇寫，今次寫返上年十一月...

築地兩大長龍 ﹣ 壽司大，大和壽司。
小心，兩大都喺場內市場，喺築地邊邊有間又係叫壽司大，但係唔關事架。我試過，其實唔差架，不過唔係兩大既級數。
呢日晨早六點幾黎到，凍凍地，落住微微雨，壽司大一樣咁長龍。
大和因為有兩個鋪位多D位，又聽聞師傅唔俾影相又趕客，所以容易排好多。
最終都係同壽司大無緣，食左大和。

座位的確非常逼。
食omakase（師傅精選），三千幾四千円（唔記得）其實唔平，其他店已經可以食到唔錯既晚餐。呢度只係早餐！
師傅都幾友善，識少少英文，有野唔食都肯換俾你。
店員就麻麻地，唔俾影相，我要靜靜雞影。
壽司款式唔多，都係大路野，材料係好新鮮，但握功較粗，賣相一般，不過已經係我喺築地試過六七間入面最好啦。

其實築地食壽司唔係一般遊客想像中咁好。
反而築地D熟食，例如八千代，值得一試。
不過如果黎築地真係想食壽司，我都會推介大和既。
一來真係好食過其他（壽司大除外），二來比壽司大易排。

要食靚壽司，東京真係好多，不過就唔係睇旅遊書或者去大商場搵囉。
唔好講到米芝蓮二萬円一餐（雖然我都想試），俾大和貴少少既午餐我會推介六本木壽司通。
食完，你就會明白咩叫做「唔同層次」。